ايه الجديد في سوق الدهب وايه التصريحات اللي قلبت موازين السوق العالمي والمحلي وايه اللي هيحصل في الأيام الجاية والأسعار رايحة على فين وايه سبب تحذير مجلس الذهب العالمي.. خليكم معانا للآخر وهتعرفوا التفاصيل في التقرير التالي.
 
معروف إن الدهب قيمته فيه وبتزيد ومعروف كمان إن ملاذ آمن للدول والافراد في الأزمان الاقتصادية ومعروف اكتر إنه معدن نادر وعشان كده ليه سعره وأهميته لكن تخيل لما المعدن النادر ده يبقي  عزيز اكتر ويحصل فيه ندرة ونقص اكبر من المعروض في الأسواق العالمية الأسعار ساعتها هتبقي ازاي.. دي اللي حذر منه مجلس الذهب العالمي.. تعالو نشوف قال إيه.

مجلس الذهب العالمي ياسيدي فجر قنبلة من النوع الكبير في الساعات الأخيرة لما قال إن قطاع تعدين الدهب في العالم والتعدين هنا مقصود بيه عملية استخراج الدهب لغاية تحويله لمعدن نقي للتدوال بيعاني من صعوبة في الحفاظ على نمو الإنتاج وبقي العثور على رواسب الدهب الأصفر أكتر صعوبة.
وقال جون ريد، كبير محللي السوق في مجلس الذهب العالمي إن العالم شهد إنتاجًا قياسيا في الربع الأول من 2024 بزيادة نسبتها 4% على أساس سنوي. ولكن الصورة الأكبر فيما يتعلق بإنتاج المناجم هي أنه في الواقع، استقر تقريبًا بين عامي 2016 و2018 ولم نشهد أي نمو في الإنتاج وقتها. وقال كمان إنه بعد  10 سنين من النمو السريع منذ حوالي عام 2008، يكافح قطاع التعدين لتحقيق نمو مستدام في الإنتاج وأوضح إن العثور على رواسب جديدة للدهب أصبح صعب في جميع أنحاء العالم لأن العديد من المناطق المحتملة قد تم استكشافها بالفعل.

يعني ايه الكلام ده ؟
يعني حضرتك باختصار الدهب بقي عزيز جدا وحجم المعدن الاكتشافات فيه بتقل وشركات التنقيب عن الدهب بتدور عليه بصعوبة وطبعا حاجة زي كده وتصريحات صادمة زي اللي اتقالت دي كفيلة تولع سوق الدهب في الأيام والشهور والسنين الجاية كمان .. ومجلس الذهب العالمي شايف مشكلة تانية كبيرة وهي إن صناعة تعدين الدهب على نطاق واسع محتاجة رأس مال كبير ويتطلب استكشافات كبيرة وإن الشركة محتاجة  في المتوسط من 10 إلى 20 سنة عشان تكتشف منجم وتجهزه للعمل عشان كده الاستثمار في التنقيب عن الدهب صعب جدا.
طيب انتاج الدهب كان دلوقتي ؟
شوف يا سيدي لغاية دلوقتى تم استخراج حوالي 187,000 طن من الدهب، معظمه من الصين وجنوب إفريقيا وأستراليا. وتقدر الاحتياطيات الدهبية اللي يمكن استخراجها بحوالي 57,000 طن، وفقًا للمسح الجيولوجي للولايات المتحدة.
طيب الأسعار رايحة على فين الفترة الجاية ؟
زي ما قلنا مش محتاجة كلام ومجلس الذهب العالمي بعد التصريح الكارثي ده توقع يوصل الدهب لارقام قياسية جديدة مع شح الإنتاج وقلة المعروض المتوقعة في السوق نتيجة انحسار عمليات التنقيب عن المعادن النفيس وعشان كده بنقول لحضرتك لو معاك دهب اصبر عليه دلوقتي ولو مش معاك يبقي تجري تشتري من الصاغة وتشيله عندك لانه هيبقي عزيز وغالي.

 



رابط المصدر

شاركها.