هو صحيح الحكومة قررت تلغي الدعم نهائى عن التموين والبنزين والسولار والغاز والكهربا ولو ده حصل ايه بدايل الحكومة والناس هتعمل ايه.. تعالو نشوف إيه الحكاية
من ساعات منصات الشر مش معاها سيرة غير اتجاه الحكومة لرفع الدعم بشكل نهائي عن التموين والمواد البترولية والكهربا وشغالة تسخين في وسائل الإعلام والسوشيال ميديا وده بعد تصريحات متحدث الحكومة عن خطط ترشيد الدعم… في الأول خلونا نوضح أن متحدث الحكومة قال في تصريحات تليفزيونية إن خطط رفع الدعم موجودة من فترة ووصل رفع الدعم في سله وخدمات معينة ل100% في الفترة اللي فاتت وقال كمان إن مفيش دعم هيتشال من السلع الأساسية وأولها رغيف العيش لكن بيتم رفع الدعم تدريجيا عن المواد البترولية والكهربا وفرق كبير بين أشيل الدعم بشكل فوري وبين وجود خطة لرفعه بشكل تدريجي عشان الناس ما تعانيش أو تتعب أو يمثل عبء على الأسر والمواطنين.
كمان الحكومة أعلنت إنه مع كل قرار رفع الدعم بشكل جزئي هيكون فيه خطط بديلة لدعم المواطن من الناحية تانية عشان ما يحصلش خلل اجتماعي أو أزمات اقتصادية وده ضمن خطة لترشيد حوالي تريليون جنيه بتروح على الدعم كل سنة وان الحكومة عندها خطط لتعويض المواطنين ومقترحات زي مثلاً صرف 1000 جنيه على كل بطاقة تموين يعني دعم نقدي وده مجرد مقترح وده مع استمرار دعم السلع الأساسية زي ماقلنا يعني محدش هيجي جمب دعم التموين زي ما بيتقال أما خطط الحكومة لرفع الدعم عن المواد البترولية والكهرباء فدي خطط موجودة واتنفذ منها جزء كبير وقربت توصل لنهايتها لكن الناس محستش بيها عشان كانت الظروف الاقتصادية افضل من كده.
طيب ليه الحكومة عاوزة تشيل الدعم عن الناس.. أول حاجة الحكومة مش هتسيب الناس لمافيا التجار والاسعار وكل الهدف هو نشر ثقافة الترشيد والتخلي عن سلوكيات التبذير والاهدار وفي نفس الوقت إعادة استخدام فلوس الدعم في مساندة المواطنين بشكل أفضل باختيار أفضل الطرق لتقديم دعم حقيقي للناس.
والحكومة قالت نصا زي ماقلنا أننا وصلنا إلى مرحلة رفع الدعم بالكامل باستثناء بعض السلع، لكن التوجه هو رفع الدعم بشكل تدريجي وإن قرارات رفع الدعم عن المواد البترولية والكهرباء؛ مش أوامر أو شروط صندوق النقد الدولي على الإطلاق، لكنها شروط ومتطلبات مصرية لا بد منها لتنفيذ برنامج الإصلاح الاقتصادي واللي هيجنبنا الوقوع في الأزمات المستقبلية وإن خطط الحكومة أن المواطن مايتأثرش بالقرارات الاقتصادية عن طريق دعمه بشكل أفضل وبشكل تدريجي.
الناس عندها حلول كتيرة لتجنب تأثير رفع الدعم أولها ترشيد الاستهلاك والاستخدام ولو وفرت بنسبة 20% بس من الكهرباء والبنزين والسلع مش هتحس بالقرارات الاقتصادية اللي جاية وبره مفيش حاجه اسمها دعم حتى في الدول اللي ظروفها أقل واصعب مننا لكن فيه ترشيد في الشراء والاستهلاك وفي أوروبا الغنية بيشتروا السلع بالوزن والقطعة والفواكه بالواحدة ومفيش إهدار.