الحكم على اي مسؤول بيكون بانجازاته الظاهرة والإنجازات اللي حصلت والناس لسه مخدتش بالها منها لكن في نفس الوقت إنجازات هتغير شكل وقوة الدولة بكل قطاعاتها والمقصود بقوة الدولة هنا كل اللي ممكن يجي في بالك اقتصاديا وسياسيا وعسكرياً واجتماعياً.. تعالى نشوف السيسي عمل ايه عشان يوصل لدولة مصر العظمى.. خليكم معانا للآخر وهتعرفوا التفاصيل
لو جينا نشوف ونحكم على سنوات حكم الرئيس السيسي لغاية دلوقتى يبقي لازم نفكركم استلم البلد ازاي واللي كانت على شفا حفرة من السقوط خاصة في الملف الاقتصادي بعد أحداث 2011 واللي قربت الدولة من الإفلاس حرفياً بسبب توقف الاستثمارات وهروب المستثمرين وتدني الاحتياطي وارتفاع تكلفة الاستيراد وفوضى عارمة في الشارع وعنف وإرهاب وتفجيرات وجماعات مرتزقة وكان مخطط مصر تغرق لعشرات السنين في ملف الفوضى دا ولو السيسي رجع الأمان والاستقرار بس في كل عهده كان يكفيه إنجاز لأننا شفنا الدول اللي وقعت حصل فيها ايه حولينا.
ولو قارننا بين مصر قبل تولي السيسي ودلوقتي اكيد التاريخ هيكون منصف ويحسب للرئيس انتشال مصر من كابوس ومؤامرات ملهاش أول من آخر وتحويلها لقوة اقتصادية وعسكرية وسياسية في المنطقة والعالم ودا مجاش من فراغ .. السيسي بدأ بملف الأمن لانه ركيزة اي استقرار ومفيش دولار واحد استثمار هيدخل بلد فيها ارهاب وجماعات إرهابية وتفجيرات ومرتزقة كمان ونجحت القوات المسلحة المصرية ومعناها الشرطة والشعب في ضهرهم في قهر الإرهاب واستعادة مصر من الجماعات المتطرفة وتفويت الفرصة على مخطط إسقاط الدولة.
بعد تحقيق الاستقرار بدأ السيسي أكبر خطة في تاريخ مصر لتحويلها من شبه دولة لدولة قوية جدا في محيطها وخلت المؤسسات الدولية تتوقع تصدر مصر أكبر الاقتصاديات في المنطقة في خلال سنوات وبعدها احتلال المركز السابع بين اقوى اقتصادات العالم كله ودا بردو مجاش من فراغ والمؤسسات الاقتصادية الدولية مش بتهزر أو تجامل لكن بتتكلم بالارقام والامكانيات والخطط المستقبلية للدول ولأول مرة مصر يكون عندها رؤية للمستقبل وهي 2030 هتنتقل بيها لحتة تانية خالص.
السيسي بدأ بالبنية الأساسية للدولة لأنها عماد اي اقتصاد قوي وهي زي الأساس اللي بتبني عليه مبنى ضخم وشاهق ومتين وفعلا نفذ احدث بنية أساسية في العالم ومصر قفزت اكتر من 100 مركز في جودة الطرق مرة واحدة واحتلت المركز رقم 18 في مؤشر جودة الطرق عالمياً ودا غير مشروعات الطاقة والموانئ واللوجستيات والصناعة والتعهيد والزراعة وحياة كريمة وكلها صرفت تريليونات الجنيهات على مدار السنين اللي فاتت.
النتيجة دلوقتي أن مصر رقم واحد في الاستثمار أفريقيا وعندها خطط طموحة للانتقال لمراحل متقدمة في التصنيع والتصدير ولما نقول تصنيع يعني تصنيع حقيقي وفي كل المجالات ودخول صناعات مكنتش موجودة قبل كده ولا فكرنا نصنعها زي صناعة الإلكترونيات والرقائق الإلكترونية والماكينات والأجهزة المعقدة والهواتف والسيارات بكل أنواعها والقطارات والسفن والصناعات الاستراتيجية ودا كله عشان نكسر سيطرة الدولار من خلال التصدير بأرقام كبيرة هتبدأ ب100 مليار دولار ودي مجرد بداية والرقم هيضاعف اكتر من مرة عشان مصر تبقي رقم مهم في التجارة العالمية.
كل المشروعات اللي بتحصل دلوقتي في الصناعة والسياحة والساحل الشمالي والمناطق الصناعية والزراعة والمياه وغيرها وغيرها هتخلي مصر في حتة تانية والاقتصاد الأكبر في المنطقة طول ما فيه هدف وتخطيط.
ببساطة السيسي فكك ألغام كتير في طريق نهوض الدولة أولها الجماعات الإرهابية ورجع الاستقرار وتاني حاجة الدولار بالتصنيع والتصدير وتالت حاجة بكسر الاحتكار في استيراد الأسلحة وبداية التصنيع والتنويع ومصر مبقتش تحت رحمة اي طرف وغيرها من الألغام اللي نجح الرئيس في إزالتها في طريق مصر العظمى.