ليه الاستثمار في الدهب هو المضمون دلوقتي وليه خبراء الاقتصاد بيحذرو من الاستثمار في العقار في الوقت الحالي وايه حكاية الفقاعة العقارية اللي هتضرب السوق.. قبل ما تشغل فلوسك .
لو سألت اي خبير اقتصادي دلوقتي وقلت له عاوز استثمر فلوسي في حاجة مضمونه هيقولك اشتري بيها دهب وسيله وابعد عن العقارات اليومين دول .. ليه بيقولوا كده ؟
عشان ببساطة اللي متابع سوق الدهب هيعرف إنه استثمار مضمون ومربح جدا حاليا ودا لأن أسعاره في الطالع دلوقتي وهتفضل تزيد لغاية 2026 والمنطق بيقول انك تشتري دلوقتي دهب بكل الفلوس اللي معاك وتشيله لما السعر يوصل للذروة وبعدين تبيعه وساعتها هتحقق مكاسب كبيرة جدا مقارنة لو حطيت فلوسك في أي حاجة تانية..
طيب ليه بيحذروا من الاستثمار في العقار دلوقتي ؟
فيه تحذيرات كبيرة من حصول الفقاعة العقارية في السوق العقاري ودي بتحصل لما أسعار العقارات بتكون مبالغ فيها ومش بتعبر عن السعر الحقيقي للعقار ومصيرها الانفجار وهبوط الأسعار بشكل كبير في وقت من الأوقات عشان كده الاستثمار فيه بيبقى مخاطرة كبيرة وخاصة لما تكون الفقاعة العقارية على وشك الحدوث.
خبراء العقارات شايفين ان عملية شراء العقار بغرض إعادة بيعه والحصول على ربح سريع منه، هتخلق حاجة اسمها “كرة الثلج”، عند طرح المراحل الأعلى سعرًا، وإن كرة الثلج مصيرها زي الفقاعة العقارية .. ومع الإقبال الكبير على من الاغلبية على شراء العقار ليس للسكن وانما بغرض إعادة البيع بربح سريع عند طرح المراحل التالية الأعلى سعرًا، فهنا يقترب السوق من الانهيار.
وحذر خبراء السوق من حجم الانفجار في سوق العقارات زي ماحصل فى بلاد كتيرة، كان آخرها الصين، وجنوب شرق آسيا قبلها وخاصة إن اكتر من 80 إلى 90% المشترين لكل المشروعات يشترون بغرض إعادة البيع السريع ولحظة البيع المثالية تكون عند طرح مرحلة تانية من ذات المشروع، اللي اشترى فيه وعادة تكون الأسعار للطرح التانى أعلى بنسبة بين 10 و20%.. وهنا بيكون وقت البيع المثالى ليه فيقوم بالبيع بربح قد يصل إلى مائتين بالمائة والمشترى للمرحلة التانية هو من نفس النوعية المشترى يريد اللحاق بقطار الأرباح السريعة اللي فاته مرحلته الاولى فبيفكر يبيع وهنا هيحصل الفقاعة والاسعار هتنزل.
الخلاصة أن الخبراء بيحذروا من سقوط سوق العقارات الفترة الجاية لان كله بيشتري عشان يبيع عشان كده بينصحوا بعدم المغامرة دلوقتي لغاية السوق ما يستقر وشايفين الدهب هو افضل وسيلة للاستثمار المربح والآمن دلوقتي بجانب الاستثمار في المشروعات الخاصة واللي مكاسبها مضمون مع سهولة التحكم في السيولة وتقلبات السوق بخلاف طبعاً الاستثمار في حاجات تانية كتير زي شهادات الادخار عالية الفايدة والبورصة.