إيه اللي بتقدمه الحكومة دلوقتي لصغار الممولين وأصحاب المشروعات الصغيرة والمتوسطة، هل هي حوافز وتسهيلات جديدة عشان تسهل عليهم ولا ناوية تفتح صفحة جديدة معاهم.. هنقولك كل التفاصيل في الفيديو ده فتابعنا للآخر.
أحمد كجوك، وزير المالية، كشف عن تقديم وزارة المالية لحزمة تسهيلات ضريبية، وأكد إنهم بيمدوا يد الثقة والشراكة والمساندة بحلول عملية مبسطة توفر حلولًا متكاملة للتحديات الضريبية، واللي بتساهم في تحسين الخدمات الضريبية.
وقال إنه هيتم تبسيط وتوحيد المعاملات بالمناطق والمأموريات، واللي هتتضمن إجراءات ميسرة لإنهاء المنازعات الضريبية المتراكمة وده كله عشان تدفع حركة النشاط الاقتصادي.
كمان وزير المالية التقى اتحاد الغرف التجارية برئاسة أحمد الوكيل، واتحاد الصناعات اللي بيمثله محمد البهى، عضو مجلس الإدارة، ووعد بأن حزمة التسهيلات الضريبية بتشمل ألا يتجاوز مقابل التأخير والضريبة الإضافية أصل الضريبة، للتيسير على الممولين، بجانب توسيع نطاق الفحص بالعينة عشان يشمل كل الممولين الملتزمين بمعايير واضحة ومحددة بكل المراكز والمناطق والمأموريات الضريبية.
يعني قريب جدا هنشوف تطبيق لسياسة تسهيل الإجراءات والإقرارات الضريبية عشان توفر الوقت والجهد للممولين وأصحاب المشروعات الصغيرة والمتوسطة والمجتمع الضريبي ككل.
كمان هيتم السماح بتقديم أو تعديل الإقرارات الضريبية عن الفترة من 2020 حتى 2023، من غير غرامات، وده بهدف إرساء مبدأ الثقة مع الممولين، بالإضافة للعمل على دعم السيولة النقدية للشركات بآلية تسوية مركزية، وسرعة وتبسيط إجراءات رد ضريبة القيمة المضافة.
الكلام ده معناه إن هيتم وضع منظومة ضريبية مبسطة ومتكاملة لصغار الممولين، والفرى لانسرز، والمهنيين لحد 15 مليون جنيه، يعني لو حضرتك منهم فالحق سجل واحصل على الحوافز والتسهيلات، ما تخافش، الحكومة بتفتح صفحة جديدة أساسها الثقة والمساندة.
وغير كده، دلوقتي بيتم تطوير منظومة الرأى المسبق ضمن منظومة الضرايب، عشان تساعد الممولين في التخطيط لمشروعاتهم، والتعرف بكل دقة على الالتزامات الضريبية المستقبلية، يعني واضح كده إن الحكومة جادة في تطويرالأداء الضريبى، وكمان هتستعين بطرف محايد عشان يقيم تنفيذ حزمة التسهيلات الضريبية مع مجتمع الأعمال على أرض الواقع، وده بالتأكيد بيعكس حرصها على تحقيق تيسيرات للمجتمع الضريبي.
والتسهيلات دي بتؤكد إن وزير المالية عنده رؤية مختلفة وأكثر واقعية لخلق بيئة أعمال صديقة للمستثمرين، وشغال بسياسة “المكاشفة والمصارحة” بهدف إنجاح مسار تطوير المنظومة الضريبية والاستفادة من البنية التكنولوجية في التيسير على الممولين.
يعني ببساطة حزمة التسهيلات الضريبية دي هتعكس قراءة واضحة للتحديات، ومرونة في تقدير الموقف، وعلاج المشكلة من جذورها، وسرعة تنفيذها على أرض الواقع هيحسن جودة الخدمات الضريبية بشكل كبير جدا.