علي مدار شهور طويلة وأسعار الفراخ والدواجن ملهاش ضابط ولا رابط واتحاد منتجي الدواجن رمي ازمة ارتفاع الأسعار علي الكهرباء وقال أنها السبب في ارتفاع الأسعار.. وحاليا الحكومة حطت خطة علشان تقضي علي الحجة دي تماما.. فا تري اية هيا الخطة وهل أسعار القراخ هتنخفض في الأسواق الفترة اللي جاية
يوم عن التاني أسعار الفراخ من زيادة لزيادة جديدة، وحاليا سعر الكيلو معدي الـ100 جنية وفي مناطق تانية اكثر من كده، ومحدش عارف الأسباب خصوصا ان أسعار العلف اللي كان اتحاد منتجي الدواجن وأصحاب المزارع بيقولوا هو السبب، طيب دلوقتي أسعار العلف مستقرة والزيادة فيها بتكون في الحدود ، فاية هيا أسباب زيادة أسعار الفراخ في الأسواق.
اتحاد منتجي الدواجن بعد ما رفع الأسعار في الأسواق علي مدار الشهور الطويلة اللي فاتت وكان تملي يبرر الزيادة بسبب ارتفاع أسعار الاعلاف، دلوقتي لقي حجة جديدة لتبرير الزيادة في الأسعار، والمرة دي قال بسبب الكهرباء، طيب مال الكهرباء ومال زيادة أسعار الفراخ.
اتحاد منتجي الدواجن قال ان الكهرباء بتقطع بشكل مستمر علي مزارع الداوجن وخصوصا في المحافظات، وقطع الكهرباء ده بيخلي نسبة كبيرة من الفراخ وخصوصا الصغيرة فيهم بتموت بسبب الحر، وبالتالي نسبة الفراخ اللي المزارع بنتجها بتكون قليلة جدا ومش بتكفي حاجة السوق، وبالتالي المعروض قدام المواطن والتجار بيقل يوم عن التاني ده غير ان سعر التكلفة علي المربي يتزيد بشكل كبير والإنتاج بيكون اقل من التكلفة واللي طبعا المربي بيضطر يحملها علي الإنتاج علشان يغطي الفلوس اللي دفعها .
اتحاد منتجي الدواجن كمل مبرراته كمان وقال أن أسعار مزارع الدواجن مش معاهم إمكانيات علشان يشتروا محطات طاقة شمسية يشغلوا منها المكيفات ومحطات التبريد لمزراع الدواجن وبالتالي الفراخ عندهم بتموت، وفي نسبة كبيرة من المربيين اضطروا انهم يوقفوا تربية الفراخ بشكل مؤقت لانها ببساطة اغلبها بيموت بسبب الحر لما الكهرباء تقطع .
طيب اية خطة الحكومة لمواجهة ارتفاع أسعار الفراخ وبيض السفرة في الأوسواق؟.
الدكتور مصطفي مدبولي رئيس مجلس الوزراء كلف وزير الزراعة واستصلاح الأراضي علاء فاروق، بدراسة المشكلة ووضع حلول مناسبة ليها، وفعلا وزير الزراعة عمل اجتماع مع اتحاد منتجي الدواجن علشان يعرف اية هيا ابعاد المشكلة، وبعدها عمل اجتماع كمان مع وزير الكهرباء والطاقة المتجددة علشان يناقشوا ازاي هيامنوا احتياجات مزارع الفراخ من الكهرباء بحيث انها متقطعش عنهم، وتفقوا علي دخول البنك الزراعي لمنح المربيين قرض بتسهيلات كبيرة وفايدة قليلة جدا لشراء الواح الطاقة الشمسية ووزارة الكهرباء هتشرف علي تركيب محطات الطاقة الشمسية لمزراع الفراخ، والمحطات دي هتكون مسئولة عن تأمين التيار الكهرباء للمزارع طول النهار ووزارة الكهرباء هتكون مسئولة عن تامين التغذية طول الليل وبالتالي مشكلة قطع الكهرباء عن مزارع الفراخ هتتحل تماما.
وزارة الكهرباء اقترحت الحل خصوصا انها عندها نسبة قطع للتيار كبيرة جدا وخصوصا في المحافظات واللي موجودة حاليا بسبب اعمال الصيانة والارتفاع الكبيرة في درجات الحرارة واللي طبعا بيخلي الكهرباء تقطع عن البيوت .