ناس كتير خلال الفترة دي بيدورا على شقة بالتقسيط، وخاصة الشباب عشان الجواز والاستقرار، عشان كده وزارة الإسكان طرحت شقق كاملة التشطيب وبالتقسيط المريح، عشان تلبي احتياجات المصريين.
دلوقتي وزارة الإسكان الاجتماعي بتطرح مرحلة جديدة من مشروع “سكن لكل المصريين 5″، واللي بيتضمن 78 ألف وحدة سكنية تقريبا، وبالفعل تم الانتهاء من جزء كبير منها وفاضل شوية.
وبالنسبة للأسعار، فقالت مي عبدالحميد، الرئيس التنفيذي لصندوق الإسكان الاجتماعي ودعم التمويل العقاري، إن أسعار وحدات “سكن لكل المصريين 5” هتكون متنوعة عشان تناسب مع شرائح الدخل المختلفة، وهتبدأ من 184 ألف جنيه لحد 400 ألف جنيه للوحدات الجاهزة في المحافظات.
أما في المدن الجديدة، فالأسعار هتتراوح بين 415 ألف جنيه و530 ألف جنيه للوحدات الجاهزة، لكن اللي هيستلم خلال 36 شهر، فالسعر هيكون بين 542 ألف جنيه و700 ألف جنيه.
طب إيه الأوراق المطلوبة عشان تقدم في الوحدات السكنية دي؟
بص يا سيدي، المستندات الأساسية هي: استمارة التقديم، الإقرار، أصل إيصال شراء كراسة الشروط، وأصل إيصال السداد، أما الأوراق المطلوبة فبيكون على حسب الفئة، يعني مثلت الأعزب، فمطلوب منه صورة بطاقة سارية، إيصال مرافق حديث (مياه، غاز، كهرباء)، ومفردات المرتب.
أما المتجوزين، فمطلوب صورة بطاقة سارية للزوج والزوجة، قسيمة الزواج كمبيوتر، شهادات ميلاد الأبناء، قيد عائلي مميكن، مفردات مرتب للزوج والزوجة، برنت تأمين، وإيصال مرافق حديث.
ومطلوب من الأرامل والمطلقات، صورة بطاقة سارية، قسيمة الطلاق أو شهادة الوفاة، شهادات ميلاد الأبناء، إيصال مرافق حديث، مفردات المرتب، برنت تأمين، وطابعة معتمدة لبيانات المعاش من التأمينات لأصحاب المعاش.
ونقدر نقول، إن مبادرة وزارة الإسكان دي واللي هي “سكن لكل المصريين 5″، بتستهدف فئات محدودي ومتوسطي الدخل، والمشروع بيشمل 78,730 وحدة سكنية، ومساحاتها بتتراوح ما بين 75 متر و95 متر، وبتكون موزعة على مجموعة من المدن والمحافظات المصرية.
طب خد عندك مواعيد التقديم، وهي بتبدأ بذوي الهمم، من 18 حتى 25 نوفمبر 2024، وباقي المواطنين من يون 26 نوفمبر لحد 24 ديسمبر 2024.
أما الأسعار فبتختلف حسب نوع الشقة وموقعها، يعني مثلا الوحدات الجاهزة للتسليم في المحافظات، فسعرها بيتراوح ما بين 184,000 جنيه و400,000 جنيه.
والوحدات لمنخفضي الدخل في المدن: تتراوح الأسعار بين 415,000 جنيه و530,000 جنيه، أما الوحدات اللي هيتم سيتم تسليمها خلال 36 شهر، فبتبدأ من 542,000 جنيه لحد 700,000 جنيه.
وماتنساش إن القسط الشهري لمحدودي الدخل 1,200 جنيه شهريًا و14 ألف جنيه في السنة وللأسرة 1,500 جنيه شهريًا و18 ألف في السنة، وبتوصل كدة التقسيط ل 20 سنة يعني حضرتك هتدفع مرتاح.
وأخيرا، لو حضرتك عايز تلحق تحجز على الشقق دي، فبسرعة ادخل على الموقع الإلكتروني لصندوق الإسكان الاجتماعي، وسجل اسمك وبياناتك.