يا ترى سمعت عن خطة مصر لإعادة صناعة الغزل والنسيج للمقدمة تاني؟ وهل ممكن الصناعة دي تبقى مفتاح جديد لتوفير العملة الصعبة؟ وإزاي الحكومة المصرية بتشتغل على إعادة إحياء صناعة بتمثل جزء كبير من تاريخنا وهويتنا؟.. فى الفيديو ده هنتكلم عن صناعة الغزل والنسيج في مصر واحدة من أعرق الصناعات اللي تراجعت لفترة لكن رجعت في بؤرة الاهتمام من جديد. خلينا نشوف إزاي مصر بتخطط تطور الصناعة دي، وإيه دورها الكبير في اقتصاد البلد.
أول حاجة، لازم نفهم إن صناعة الغزل والنسيج في مصر ليها تاريخ طويل. مش مجرد صناعة عادية، دي صناعة بتمثل جزء من تراثنا ومن صورة مصر قدام العالم. زمان، كانت مصر بتصدر أفخر أنواع الأقمشة. والمصريين كانوا معروفين بجودة النسيج اللي بينتجوه. بس مع مرور الوقت، الصناعة دي بدأت تضعف، لأسباب كتير زي ارتفاع تكاليف الإنتاج، وزيادة المنافسة من دول تانية، وظهور مشاكل كتير في جودة المنتجات وطرق التسويق… والنتيجة كانت الصناعة المصرية خسرت جزء كبير من مكانتها على مستوى العالم.. لكن الحكومة المصرية أدركت أهمية الصناعة دي ومؤخراً بدأت في تنفيذ خطة طموحة لإعادة إحياء قطاع الغزل والنسيج.
السؤال اللي ممكن ييجي في بالك دلوقتي: ليه الاهتمام الكبير ده بالصناعة دي تحديداً؟
الإجابة بسيطة: الغزل والنسيج مش بس صناعة عريقة لكنها كمان مصدر قوي لجذب العملة الصعبة.. تخيلوا لو قدرنا نوصل لمنتج بجودة عالية يقدر ينافس عالمياً؟ ده معناه زيادة في التصدير، ومع زيادة التصدير هيزيد معانا احتياطي العملة الصعبة، اللي بدوره هيقوي اقتصادنا ويوفر فرص عمل كتير للشباب
طب ايه خطة الحكومة لتطوير الصناعة دي؟
الحكومة المصرية وضعت خطة شاملة لتطوير صناعة الغزل والنسيج الخطة دي بتعتمد على أكتر من محور.. في البداية، تم تخصيص ميزانيات ضخمة لتحديث المصانع القائمة وكمان بناء مصانع جديدة بأحدث التقنيات العالمية.. وحسب التقارير الأخيرة الدولة خصصت استثمارات تصل لأكتر من 21 مليار جنيه مصري، عشان تعيد إحياء الصناعة دي. وده بيعكس الاهتمام الشديد بعودة الصناعة للمقدمة
واحد من أكبر مشاريع تطوير الغزل والنسيج في مصر هو مجمع الروبيكي الصناعي في مدينة العاشر من رمضان..و المجمع ده بيضم مصانع كتير في مجالات الغزل والنسيج والصباغة، وبيهدف إنه يكون واحد من أكبر المراكز المتخصصة في الشرق الأوسط وأفريقيا.. كمان فيه مشاريع تطويرية تانية في المحلة الكبرى ودمياط وغيرها من المناطق اللي ليها تاريخ طويل في صناعة النسيج
كمان الحكومة بتشتغل على تدريب الكوادر الشبابية في المجال ده. . يعني مش بس بنحدث الآلات والمصانع، لكن كمان بنركز على إننا نوفر عمالة ماهرة تقدر تشتغل على أعلى مستوى. ده شيء مهم جداً، لإن وجود العمالة المدربة بيضمن إن المنتج النهائي يكون بجودة عالية ينافس في الأسواق العالمية
وخد بالك إعادة إحياء صناعة الغزل والنسيج في مصر مش مجرد خطوة اقتصادية لكن كمان خطوة اجتماعية. تخيلوا معايا حجم فرص العمل اللي الصناعة دي هتوفرها.. آلاف العمالة هيكون ليهم مكان في مصانع الغزل والنسيج. وده مش بس هيقلل من نسبة البطالة، لكن كمان هيساهم في رفع مستوى معيشة كتير من الأسر.
على المستوى الاقتصادي إعادة إحياء الصناعة دي هيكون ليه تأثير كبير.. مصر هتقدر تصدر منتجات بجودة عالية وتنافس منتجات دول زي الصين والهند. وكل ما تزيد الصادرات، ده معناه إن الاقتصاد المصري هيستفيد من تدفق عملة صعبة بشكل مستمر
في النهاية نقدر نقول إن إعادة إحياء صناعة الغزل والنسيج في مصر خطوة إيجابية هتفرق كتير.. الموضوع مش مجرد تطوير صناعة قديمة لكنه بداية لعودة مصر لمكانتها كمركز رئيسي في صناعة الغزل والنسيج على مستوى العالم