تعرف إنك تقدر تفتح حساب في البنك أو تحصل على بطاقة ميزة وتستخدم كل ده من غير ما تدفع ولا مليم؟طبتعرف ان فيه أكتر من خدمة البنوك بتقدمها من دلوقتى ولنهاية شهر اكتوبر ببلاش؟ .. وفى الفيديو ده هنعرفك على كل الخدمات اللى تقدر تعملها دلوقتي بدون مقابل ولادفع رسوم
البنوكالمصرية وبتعليمات من البنك المركزي بتقدم الأيام دي “خدمات بنكية مجانية من غير ولا مليم”، كجزء من مبادرة الشمول المالي اللي أطلقها البنك المركزي المصري.. ودي فرصة حقيقية للناس إنهم يستفيدوا من خدمات البنوك بدون أي رسوم لحد نهاية أكتوبر.
البنوك في مصر بتحتفل بالأسبوع العالمي للشمول المالي واليوم العالمي للادخار وعلشان كده بتوفر مجموعة خدمات مجانية عشان تشجع المواطنين على الدخول في النظام المالي الرسمي وتحسين حياتهم المالية
طب إيه هي الخدمات المجانية اللي بنتكلم عنها؟
أول حاجة وأهم حاجة إنك تقدر تفتح حساب جاري أو توفير في أي بنك مشارك في المبادرة ومن غير ما تدفع رسوم ولا حتى يكون فيه حد أدنى لفتح الحساب.. يعني لو كنت دايمًا بتفكر تفتح حساب بس مش قادر بسبب المصاريف دي فرصتك المثالي
مش بس كده البنوك بتقدم كمان استخراج بطاقة ميزة للخصم الفوري مجانًا وكمان إصدار بطاقة ميزة المدفوعة مقدما بدون أي رسوم.. وده هيسهل عليك كتير إنك تقدر تستخدم خدمات الدفع الإلكتروني وتشتري من غير ما تحتاج كاش
طب لو ليك نشاط اقتصادي.. إزاي تستفاد من المبادرات دي ؟
لو عندك شركة صغيرة أو بتبدأ مشروع جديد دلوقتي تقدر تفتح حساب شمول مالي للشركات مجانا وده هيساعدك تدير نشاطك المالي بشكل احترافي ومنظم بدون ما تدفع أي مصاريف على فتح الحساب
والشباب كمان ليهم نصيب كبير في العروض دي.. لو عمرك أقل من 16 سنة تقدر تحصل على بطاقة مدفوعة مقدما مجانا ضمن برنامج الشباب.. ولو عمرك من 16 لـ21 سنة مش محتاج موافقة ولي الأمر لفتح الحساب أو الحصول على بطاقة الخصم الفوري.. واللي هتكون برضه مجانية تمامًا يعني الشباب دلوقتي يقدروا يبدأوا حياتهم البنكية بسهولة وبدون أي تعقيدات.
كمان لو بتفكر تاخد قرض شخصي البنوك بتقدملك فرصة إصدار بطاقة ائتمانية مجانًا في حالة الحصول على القرض.. وده هيساعدك في تسهيل إدارة مصاريفك واحتياجاتك الشخصية.. كل العروض دي بتتم لغاية نهاية أكتوبر، يعني الوقت مش طويل والفرصة مش هتستمر كتير.. الفكرة ورا المبادرة دي هي تشجيع الناس على الدخول في النظام المالي الرسمي والاستفادة من الخدمات اللي ممكن تساعدهم في تحسين حياتهم المالية.
طب ليه البنوك بتعمل كده؟
البنوك في مصر بالتعاون مع البنك المركزي بيحاولوا يحققوا الشمول المالي.. وده معناه إنهم عايزين يدخلوا أكبر عدد من الناس في النظام المالي الرسمي.. ولما يكون عندك حساب في البنك تقدر تدير فلوسك بشكل أحسن وتستفيد من خدمات زي القروض و بطاقات الائتمان والتحويلات البنكية .. وده بيساعد في تحسين جودة الحياة وتحقيق استقرار مالي أكبر للمجتمع ككل.
كمان لما الناس تبدأ تستخدم الحسابات البنكية والخدمات المالية الرسمية.. ده بيساعد الدولة إنها تقدر تدير الاقتصاد بشكل أفضل وبيقلل من التعاملات النقدية اللي بتكون صعبة في التتبع والمراقبة.