يا ترى إيه قصة الأتوبيس الترددي السريع اللي هيشتغل على الطريق الدائري، واللي كمان وزارة النقل بتعمله حارات خاصة على الطريق، هل هو مشروع نقل جماعي جديد ولا خدمة زي أوبر وكريم، وهل هيكون مواصلة لكل الناس ولا لفئة معينة بس.. هنقولك كل التفاصيل في التقرير التالي.
الحكومة دلوقتي بتفكر تعمل مشروعات تنافس بيها القطاع الخاص، واللي منها مشروعات النقل الجماعي زي الاتوبيس الترددي السريع BRT
، اللي هيمسح الطريق الدائري كله ومش هيخلي راكب إلا ويوصله لمكانه.
فكرة الأتوبيس الترددي جت للحكومة من منطلق ربط محافظات القاهرة والجيزة والقليوبية ببعضها، يعني ربط القاهرة الكبرى، وكمان عشان الفلوس اللي بيصرفها المواطنين على المواصلات الخاصة تنزل في جيب الحكومة.
وبالفعل، تم تخصيص حارتين (حارة لكل اتجاه) بمنتصف الطريق الدائري عشان تمشي الأتوبيسات الجديدة، ومع تشغيله هيتم منع سير الميكروباصات على الطريق تماما، وده متوقع له بنهاية سنة 2024.
مشروع الأتوبيس الترددي هيمتد بطول 106 كم ، والاتوبيسات هتعمل رحلات رايح جاي في نقس المسافة، وبيتم تنفيذ المشروع على مرحلتين بواقع 49 محطة.
ومن المستهدف تشغيل 100 أتوبيس كهربائي، بطول الطريق، وهيتم الربط مع وسائل النقل الأخرى، منها مواقف السيرفيس أسفل الطريق الدائري وكذلك وسائل النقل الأخرى زي المترو والقطارات والسوبر جيت.
والمحطات تم اختيارها في أماكن مناطق كثيفة السكان، وقريبة من محطات النقل الجماعي للوسائل الأخرى مثل محطات مترو الانفاق وهي:
“محطة المشير طنطاوى – محطة كايرو فستيفال سيتى – محطة أكاديمية الشرطة – محطة طريق السويس – محطة عدلي منصور – محطة موقف العاشر من رمضان – محطة غرب الرشاح – محطة التروللي – محطة مؤسسة الزكاة- محطة مصرف بلبيس – محطة عزبة الجزيرة – محطة المرج – محطة رشاح والخصوص – محطة مسطرد – محطة متولي الشعراوي – محطة العصار – محطة منطي – محطة إسكندرية الزراعي – محطة بسوس – محطة بسوس القناطر – محطة الوراق – محطة تحيا مصر – محطة مترو إمبابة – محطة بشتيل – محطة أحمد عرابي – محطة أرض اللواء – محطة محور 26 يوليو – محطة المعتمدية – محطة زنين – محطة صفط اللبن – محطة منشية البكاري – محطة النور – محطة مسجد المدينة – محطة فيصل – محطة الهرم – محطة ترسة – محطة مصر للطيران – محطة الطالبية – محطة المنيب – محطة البحر الأعظم – محطة الزهراء – محطة العزبة – محطة محور الحضارة – محطة الجزائر – محطة الأوتوستراد – محطة الهضبة الوسطى – محطة سيتي سنتر المعادي – محطة الصيد – محطة البروان – محطة محور الشهيد – محطة مدخل التجمع.
ومن هنا الأتوبيسات هتدخل المحطات أعلى الدائري، والمواطن هيقدر يركب من المحطة اللي هيوصل لها من خلال نفق أو سلم مشاه.
كمان هيكون في ساحات انتظار للملاكي أسفل محطات الأتوبيس الترددي، وشاشات لمعرفة وقت الوصول وزمن التقاطر (سيكون 10 دقائق تقريبا)، والاتوبيسات هتشتغل على مدار 24 ساعة من خلال 3 دوريات عمل.
أما عن التذاكر، فهيكون في نوعين من التذاكر، الأولى التذكرة الثابتة، والثانية التذكرة المرنة وهترتبط بعدد المحطات، لأن التكلفة هتكون بالكيلو.
طبعا هتسألني عن شكل الأتوبيسات، بص يا سيدي الشكل هيكون شبه الأتوبيسات الأوروبية وسرعتها هتكون زي قطارات المترو ، وكلها هاتشتغل مش بنزين ولا سولار، وكمان المحطات والاتوبسات مزودة بمراقبة بالكاميرات، والاتوبيس الواحد بيسع 170 راكب وقابل للزيادة بزيادة عدد العربات.. بعني كل واحد يدور علي أقرب محطه لبيته هتوصل بيتك في لمح البصر.
أما عن موعد التشغيل، فمخطط له إن شاء الله نهاية السنة دي 2024.