يا ترى إيه قصة مصنع فلنكات القطار السريع اللي عمله الفريق كامل الوزير، وهل ده أول قرار نفذه على أرض الواقع بعد ما مسك وزارة الصناعة بجانب وزارة النقل ولا لأ.. هنعرفك الحكاية بالتفصيل في الفيديو ده.
ملف الصناعة أصبح من أهم الملفات الضرورية والملحة الموجودة على أجندة الحكومة بشكل يومي وخاصة المجموعة الاقتصادية، لأن ببساطة الصناعة هي قاطرة التنمية الاقتصادية، وجاذبة للعملة الصعبة اللي بتعمل المستحيل.
وفي السنة الأخيرة، وزارة النقل، أنشات مصنع فلنكات لتوفير مهمات السكة الحديد والقطار السريع اللي بتحتاجها مصر، وعدم استيرادها من الخارج، وده تنفيذا لتوجيهات الرئيس عبد الفتاح السيسي بتوطين الصناعة كبديل عن الاستيراد وتوفير العملة الصعبة، وكمان لتوفير فرص العمل .
المصنع ده اسمه مصنع إنتاج الفلنكات الخرسانية الخاصة بمشروع القطار الكهربائي السريع، وموجود في منطقة المعصرة في حلوان باستثمارات تبلغ حوالي 500 مليون جنيه، وتم تشغيله وافتتاحه في شهر نوفمبر من السنة اللي فاتت 2023.
المصنع ده بيتم فيه استخدام أحدث النظم العالمية وبأيدي مصرية لتوطين هذه الصناعة بالدولة، كمان بيتم الاعتماد على خامات مصرية بنسبة 100 % توفيرا لاستخدام العملة الأجنبية.
والقدرة الإنتاجية للمصنع حوالي 550 ألف فلنكة سنويا، والمصنع تم إقامته على حوالي مساحة 40 ألف متر مربع، وبيضم عدة مباني أخرى، منها (المقر الإداري – المعمل المركزي – المخازن الرئيسية) بالإضافة إلى وجود مساحات تخزين وتشوين تبلغ مساحتها حوالي 7 ألف متر مربع.
وفي تصريحات صحفية، قال المهندس محمد عامر، رئيس هيئة السكة الحديد، أن الهيئة تمكنت من تصنيع مئات القطع التى تحتاجها للصيانات “مهمات السكة الحديد”، وأكد كمان أننا “قدرنا نصنع كل أجزاء قطع الغيار التى نستخدمها واللي كنا نستوردها من الخارج، لتقليل استخدام العملة الصعبة.
وأكد كمان أن أخر قطعة توصلنا لصناعتها تسمى “بلنجة” او رابطة وأخدوا 6 شهور لتجربتها وتصنيعها بعد أن كان في شركة ألمانية بتحتكر تصنيعها.
وأشار رئيس هيئة السكة الحديد، إلى أن المهمات التى تم تصنيعها نتاج مجهود ذاتي للسوق المحلي، وبتوفر لنا ملايين الدولارات.
وبكده نقدر نصنع مهمات السكك الحديدية والقطار السريع وكمان مترو الأنفاق في مصر زي ما بتعمل دول كتيرة منها ألمانيا.