يا ترى ليه البنك المركزي بقاله فترة طويلة بيسحب السيولة من البنوك؟ وبيوظف السيولة دي كلها في ايه؟ وايه تأثير تحركات المركزي على أسعار السلع فس الأسواق؟
في الفترة الاخيرة تقريبا ما بيمرش أسبوع الا وبيقوم البنك المركزي المصري بسحب سيولة من البنوك تفوق التريليون جنيه من خلال عطاءات السوق المفتوحة وبعائد ثابت مرتفع بيصل إلى 28%.
فيا ترى الكلام ده معناه ايه؟ وايه هي السيولة الفائضة اللس البنك المركزي بيجمعها من البنوك؟
بص يا سيدي السيولة الفائضة دي تقدر تقول انها كميات ضخمة من الأموال بتكون موجودة بحوزة البنوك .. ولو البنك المركزي ما سحبهاش البنوك هتكون مضطرة تقرضها سواء للشركات او الأفراد وده معناه انه هيتم ضخ سيولة ضخمة في الأسواق وده هيرفع الطلب على السلع والعقارات والخدمات، وبالتالي هيرتفع التضخم.
طب البنك المركزي بيعمل ايه عشان يسحب السيولة من البنوك؟
عشان المركزي يسحب السيولة بيربط ودائع للبنوك عنده لمدة أسبوع فقط ومن اهداف العملية عدم السماح بوجود تشوه في أسعار الفايدة في السوق.
والبنوك بالفعل عندها سيولة مرتفعة ووفقا لاخر بيانات ارتفعت سيولة القطاع المصرفي بنحو 1.5 تريليون جنيه في أول ٥ شهور من ٢٠٢٤ لتصل إلى 10.3 تريليون جنيه بنهاية مايو.
وارتفع النقد المتداول خارج الجهاز المصرفي بنحو 130 مليار جنيه، ليصل إلى نحو 1.2 تريليون جنيه، لكن جزء من الارتفاع ده مفهوم لأن قيمة الجنيه انخفضت وبيحتاج “المركزي” إلى السيطرة على المعروض النقدي للسيطرة على التضخم.
وكان البنك المركزي بيستقبل رقم محدد من الودائع بيحدده بنفسه وبيستقبل الطلبات من البنوك لإيداع فائض السيولة وبعدها بيعمل عملية تخصيص بالنسبة والتناسب لكل البنوك.
لكن في أبريل الللي فات، غير البنك المركزي الأسلوب ده وتحوّل إلى قبول جميع العطاءات المقدمة.
ولما بيكون عند البنوك المصرية سيولة فائضة، أي سيولة تفوق نسبة الاحتياطي الإلزامي بتقوم بتوظيفها في واحد من ٣ خيارات اولها انها تقرضها لبنك تاني في سوق ما بين البنوك، أو ما يسمى بالإنتربنك، بفائدة الكوريدور أو نستثمرها في أذون خزانة بفائدة تقارب الكوريدور او تودعها في المركزي بفائدة تساوي متوسط الكوريدور.
وال ٣ خيارات عديمة المخاطرة وبالتالي بما أن المخاطرة شبه واحدة، فالبنك بيبحث عن توظيف السيولة في الأصل صاحب الفائدة الأعلى.
ويقدم البنك الفائدة الأعلى وهي 27.75% خاصة مع انخفاض أسعار الفائدة على أذون الخزانة وده بيحقق فائدة مرتفعة للبنوك لتوظيف سيولتها.
طب ده ليه تأثير على البنك المركزي ؟
مفيش شك أن ارتفاع حجم الودائع اللي بيقبلها المركزي أسبوعيا بفائدة مرتفعة يعني تحقيق المركزي خسائر، ولكن وفقا للمحللين المركزي جهة تنظيمية لا تستهدف الربح والهدف الأساسي اللى لازم التركيز عليه هو السيطرة على التضخم وسلامة القطاع المصرفي لكن بطبيعة الحال لازم يكون فيه مدى زمني معقول لتحمّل الخساير.
وبيكون سحب السيولة مفيد للمواطن لانه ليساعد في الحد من ارتفاع الأسعار لكنه في المقابل بيحد من وفرة الأموال المتوفرة للإقراض من البنوك، وبيبقي معدلات الفائدة مرتفعة