في ناس كتير بتتفاجي أن الرصيد في العدادات أبو كارت مش موجود وللاسف بيكونوا مش عارفين اية السبب واللي يقول ان وزارة الكهرباء بتسرق الناس وكلام كتير مهلوش أول من أخر.. لو عايز تعرف اية اللي بيخلي الرصيد يتخصم من العداد أبو كارت شوف الفيديو ده للاخر.
اكيد سمعت أو شوفت أو حصلت معاه أو حصلت من حد جارك أو صحبك أو اي حد من عارفك، أن الرصيد في العداد مسبق الدفع واللي مشهور باسم العداد أبو كارت مش موجود أو جزء كبير منه اتخصم خصوصا أول تشحن الكارت وتحطه في العداد، وهنا تسمع الكلام اللي بيتقال أن الدولة بتسرق الناس ووزارة الكهرباء بتقلب جيوب المصريين وكلام كتيرة من النوع ده.
وقبل ما تنقل الكلام أو تردده بدون فهم لازم تعرف أن في اسباب كتير جدا بسببها العدادات مسبق الدفع أو ابو كارت زي ما الناس بتسميه بتخصم من الرصيد اللي موجود في العدادات بسببها وهنتكلم عليها معاكم واحدة واحدة.
أول سبب لخصم الرصيد من العدادات أبو كارت هو الاقساط اللي بتكون موجودة علي العدادات بسبب عدم دفع الرسوم اللازمة لتركيب العدادات وهنا الدولة بتقسط قيمة المديونية دي علي 24 شهر، وفي بداية كل شهر العداد هيخصم منك قيمة معينة.
ثاني سبب لخصم الرصيد هو لو في تراكمات استهلاك علي العداد وخصوصا من العدادات القديمة للناس اللي بتغير العداد القديم وتركب عداد جديد من أبوكارت، وشركات توزيع الكهرباء بتجدول التراكمات والمتأخرات على هيئة أقساط شهرية وبتكون وفقا لمتوسط الاستهلاك الشهري للمواطن.
السبب التالت لخصم الرصيد من العدادات أبوكارت هو خصم فرق شرائح الكهرباء واللي بتكون وفقا للاستهلاك الشهري واللي بتبدأ مع بداية كل شهر ميلادي، خصوصا أن كل العدادات من النوع مسبق الدفع بترجع للشريحة الأولي في أول يوم للشهر الميلادي.
طيب الخصم من الرصيد بسبب فرق الشرايح ده بيكون أزاي؟.
الدولة حددت الشريحتين الأولى والتانية هما اعلي شريحتين بيحصلوا علي دعم حكومي، وفي حالة ارتفاع الاستهلاك عن 100 كيلو وات اللي هما مخصصين للشرحتين الأولي والتانية المواطن بيدخل للشريحة التالتة وبيخصم منه 22 جنيه كفرق الانتقال من شريحة للشريحة التالتة خصوصا أن العداد بيرجع للقراءة صفر، ولو المواطن تعدي في الاستهلاك 650 كيلووات ووصل للشريحة السادسة بيخصم منه 378 جنيها فرق سعر شريحة خصوصا أن العداد بيرجع للمحاسبة من الصفر مرة تانية وبيكون حساب سعر الكيلوات ساعة بسعر التكلفة الفعلية للإنتاج .
رابع حاجة العداد بيخصم عليها هيا القراءة صفر، وده بيحصل مع الناس اللي قافلة الشقق أو البيوت بتاعتها ودي معروفة باسم القراءة الصفرية وبيختصم من المواطن 9 جنية شهريا.
خامس حاجة العداد بيخصم علشانها وهيا خصم رسوم خدمة العملاء علي الشرائح ودي بتختلف من شريحة للتانية، وفي الشريحة الاولي من صفر إلى 50 كيلووات العداد هيخصم جنية، وفي الشريحة التانية من 51 إلى 100 كيلووات العداد هيخصم 2 جنية، وفي الشريحة التالتة من صفر حتى 200 كيلو وات العداد هيخصم 6 جنية، وفي الشريحة الرابعة من 201 إلى 350 كيلو وات العداد هيخصم 11 جنية، وفي الشريحة الخامسة من 351 إلى 650 كيلو وات العداد هيخصم 15 جنية، وفي الشريحة السادسة من 650 حتي 1000 كيلووات العداد هيخصم 25 جنية، وفي الشريحة السابعة للاستهلاك أكثر من 1000 كيلو وات العداد هيخصم 40 جنية.
اخر حاجة العداد بيخصم رصيد بسببها هيا مقابل الرسوم والدمغات ودي العداد بيخصم نسبة معينة من الرصيد علشانها مع نهاية كل شهر .