يا ترى إيه المفاجأة السارة اللي بينتظرها المواطنين، هل هي مرتبطة بخفض الأسعار فعلا ولا لأ؟، وهل الخفض ده ممكن يشمل كل السلع ولا حاجات معينة، ونسبة الانخفاض هتبقى كام وهتوفر كام على المواطن.. هنقولك كل التفاصيل في الفيديو ده.
انهاردة، الأوكازيون الصيفي لسنة 2024 بدأ وهيستمر لمدة شهر، والأكازيون ده طبعا مرتبط في أذهاننا كلنا بتخفيض الأسعار وتحطيم أسطورة “اللبس اللي مش هانقدر نشتريه”، يعني من الآخر هتشتري كل اللي في نفسك فيه.
والأوكازيون السنة دي بيقدم خصومات على السلع الغذائية ومستلزمات المدارس وكمان الملابس بنسبة تتراوح من 10% ل50%، وأكبر نسب خصومات بتكون على الملابس والسلع الموسمية الخاصة بالصيف.
والسنة دي في 1000 محل بيقدم تخفيضات وخصومات في كل المعروض في الأوكازيون، ومرشح أن المحلات دي توصل ل 4 آلاف محل، يعني هتقدر تتسوق وتروق وتوفر فلوسك.
ووزارة التموين اللي مسئولة عن تنظيم الأوكازيون، أكدت على المحلات المشاركة في الأوكازيون، أنها لازم تلتزم بالإعلان عن ثمن السلع المعروضة للبيع بالتخفيض اللازم والمحدد، وحذرتهم كمان من التلاعب في الأسعار، أو انهم يعملوا إعلانات مضللة اللي بتكون على عكس الحقيقة، وقالت كمان إن اللي هيعمل كده هيعرض نفسه لعقوبة الغش التجاري، وغرامة مالية قد تصل إلى 2 مليون جنيه.
كمان وزارة التموين، طالبت المحلات التجارية الراغبة في المشاركة بالأوكازيون الصيفي، بسرعة التوجه إلى مديريات التموين الواقع في دائرتها المحل للحصول على الموافقة والحصول على تصريح، عشان يقدر يشارك حوالي 4 آلاف محل على مستوى الجمهورية، وتقدم كل خدماتها للمواطنين بأسعار مخفضة.
وبالنسبة للوضع جوه الأوكاوزيون، فالمحل بيقوم بوضع نسبة التخفيضات على المعروضات عشان يجذب أكبر عدد من الزبائن وينشط حركة البيع والشراء، كمان التجار بيستنوا موسم الأوكازيون عشان يخرجوا من حالة الكساد اللي بيعانوا منها طول السنة، أما المواطنون فهما كمان بيستنوا الأوكاوزيون عشان يشتروا احتياجاتهم من السلع المختلفة بأسعار مخفضة تناسب دخولهم.
ونقدر نقول إن كل سنة، بتبقى محلات الملابس هي الأكثر جذبا للمواطنين، لأن اللبس دايما بيرتبط بالمواسم وبينزل عليه خصومات ممكن توصل للنص.. وطبعا كل المحلات عايزة تتخلص من اللبس القديم بأي شكل عشان لا تخزن ولا تخسر، وكمان عشان الموضة كل سنة بتتغير.
طب والأسعار؟.. بص حضرتك هي ممكن يوصل سعر البلوزة بعد التخفيض من 300 إلى 550 جنيها ، والبنطلون الحريمي بين 350 إلى 600 وأيضا الرجالي بعد التخفيضات من 330 إلى 490 جنيها ، والفستان بعد التخفيض بين 350 إلى 700 جنيه، والعبايات الحريمى سعرها من 600 إلى 1200جنيه.. يعني اشتري اللي يناسب واللي على قد فلوسك.