يا ترى ايه اللى بيحصل فى موارد مصر من العملة الصعبة؟ وايه القطاعات اللى حققت نمو كبير وايه القطاعات اللى حصل فيها تراجع ضخم؟ وازاى الحكومة ممكن تتصرف وتسد العجز اللى هيحصل فى التدفقات الدولارية من المصادر الخمسة التقليدية؟
مصر بقالها اكتر من سنتين بتعانى من ازمة حادة فى نقص العملات الأجنبية وتحديدا فى الدولار بسبب الفجوة التمويلية الكبيرة اللى حصلت فى الموازنة العامة نتيجة تداعيات الحرب الروسية الاوكرانية واللى كانت سبب مباشر فى ارتفاع الحبوب والنفط وكل السلع اللى بيتم استيرادها
والحكومة بقالها فترة بتدور على موارد غير تقليدية للعملة الأجنبية عشان تقدر تسد العجز وتسدد التزاماتها الخارجية زيمثلا برنامج الطروحات الحكومية اللى من خلاله بتبيع شركات ومؤسسات مملوكة للدولة لصناديق استثمار عربية واجنبية أو تدخل فى شراكات استثمارية كبيرة زي ما حصل فى مشروع تطوير راس الحكمة مع الجانب الاماراتي واللى دخل للبلد 35 مليار دولار
لكن للاسف فى الوقت اللى بتحاول فيه الحكومة انها تلاقي مصادر جديدة للدولار الموارد الخمسة الثابتة للنقد الأجنبية فيه كتير منها بيحصل فى فيه تراجع كبير وده بيفرض أعباء جديدة على الدولة
طب يا ترى ايه موارد الدولار اللى حصل فيه انخفاض؟
وفقا لآخر احصائية رسمية عن موارد النقد الأجنبي لكل قطاع من الموارد الخمسة خلال أول 9 شهور من العام المالي (2023-2024) مقارنة بنفس الفترة من العام السابق (2022-2023) إيرادات قناة السويس واحدة من أهم موارد العملة الصعبة اللى انخفضت بشكل ملحوظ ووصلت إلى 5.8 مليار دولار مقارنة بـ 6.2 مليار دولار بنسبة تراجع 7.4% بسبب التوترات في منطقة البحر الأحمر وهجمات الحوثيين على عدد كبير من السفن واعلان اكتر من وكيل ملاحي عالمي وقف رحلاته عبر قناة السويس
ومن الموارد اللى تراجعت بشكل ملحوظ تحويلات المصريين بالخارج اللى انخفضت إلى 14.5 مليار دولار من 17.5 مليار دولار بانخفاض 17.1% على أساس سنوي وطبعا ده كان بسبب تعدد سعر الدولار فى مصرقبل 6مارس وقرارات البنك المركزي التاريخية بتحرير سعر الصرف واللى من بعده رجعت التحويلات من جديد الى حدودها الطبيعية
كمان الصادرات شهدت تراجع كبير ووصلت إلى 24.12 مليار دولار مارنة ب 31.1 مليار دولار السنة اللى فاتت بتراجع 22% على أساس سنوي .. لكن حاليا فيه خطط لزيادة الصادرات والدولة مهتمة جدا بالملف ده وبتدعم المصدرين
طب مفيش موارد نقد أجنبي حققت زيادة أو حصل فيها انتعاشة؟
لا طبعا فيه أخبار سعيدة ومنها ان لاستثمارات الأجنبية المباشرة ارتفعت إلى 23.71 ملياردولار مقارنة 7.94 مليار دولار بنفس الفترة من العام الماضي بزيادة 198% على أساس سنوي.. كمان السياحة: سجلت 10.9 مليار دولار من 10.3 مليار دولار بزيادة 5.8% على أساس سنوي.