النهاردة اليوم الثاني لتطبيق مبادرة خفض أسعار السلع الأساسية في اللي اعلن عنها الدكتور مصطفي مدبولي رئيس مجلس الوزراء في اجتماعه من المصنعين والتجار لوضع اليه لانخفاض الأسعار بعد الخطوات اللي عملتها الحكومة لتوفير الدولار في البنوك.. يا تري اية اللي حصلت بعد 45 ساعة من تطبيق المبادرة. وهل في سلع فعلا أسعارها انخفضت.
الدكتور مصطفي مدبولي رئيس مجلس الوزراء عقد اجتماع من كام يوم مع التجار والمصنعين وطالبهم بنزول أسعار السلع الأساسية اللي المواطنين بشتروا في حياتهم اليومية بقيم معقولة، وتم الاتفاق علي بداية نزول أسعار السلع من 15 الي 20 في المائة من امبارح، وهتوصل لحد 30% بعد عيد الفطر، خصوصا بعد الدولة وفرت الدولار في البنوك الرسمية لهم بسعره الرسمي وافرجت عن البضائع اللي كانت متخزنة في المؤاني من شهور واللي كانوا مش عارفين يفرجوا عنها بسبب ازمة نقص الدولار .
الدكتور مصطفي مدبولي كان صريح جدا مع التجار والمصنعين وطالب منهم وجود تخفيضات حقيقية مش كلام وخلاص، وقال لوزير التموين والتجارة الداخلية عايز اشوف تخفيضات حقيقية في الأسعار مش كلام علي الورق زي ما كان بيحصل قبل كده لما اسال يقولي يا فندم بدأنا نطبق التخفيضات ولما انزل اسال علي الأسعار القيها زادت ولما اكلمك تقولي اصل حضرتك نازل سوق تجاري او هيبر من بتوع الأغنياء، والتخفيضات دي موجودة في الأسواق بتاع الناس الفقراء، ولما انزل هناك بردوا مش بلاقي انخفاض في الأسعار.
طيب اية اللي حصل بعد 48 ساعة من اجتماع رئيس مجلس الوزراء مع التجار والمصنعين؟.
أحمد الوكيل، رئيس اتحاد الغرف التجارية، قال إنه تم التنسيق مع جميع تجار ومنتجى المنتجات الغذائية المختلفة ومنها اللحوم والألبان والسكر والأرز والطحين والمكرونة علي المشاركة فى المبادرة الجديدة، وانه هيتم طرح السلع الغذائية بتخفيضات هتوصل لـ 30%، أن مبادرة تخفيض السلع مش هتشمل السلع غذائية بس، ده كمان هتشمل الصناعات الهندسية وبعض الإلكترونيات.
رئيس اتحاد الغرف التجارية كمل كلامه وقال، أن في 25 سلعة أساسية اسعارها انخفضت النهاردة في الأسواق زي السكر والزيت والمكرونة والألبان والأسماك والفاكهة، وسجل سعر لتر زيت الطعام 95 جنيها، بتراجع 2.76 قرشا، ووصل سعر كيلو السكر لـ 39 جنيهًا، بتراجع 4 جنيه في الكيلو الواحد، ووصل سعر كيلو المكرونة لـ 30 جنيهًا، بتراجع 0.87 قرشا، ووصل سعر كيلو العدس لـ 71 جنيه بتراجع 4.25 جنيه في الكيلو، وسعر كيلو الفول وصل لـ 55 جنيه بتراجع 4 جنيه، ووصل سعر البيضة البلدي لـ5 جنيه بتراجع 0.37 قرش، وسعر كيلو الشاي وصل 230 جنيه بتراجع 18 جنيه.
الوكيل كمل كلامه عن انخفاض أسعار السلع وقال أن أسعار الألبان والأسماك، تراجعت في السوق وسجل سعر لتر اللبن 41 جنيه بتراجع 1.17 جنيه، وسجل سعر اللبن 25 جنيه، ووصل سعر كيلو اللبن السائب لـ 28 جنيها، بتراجع 0.34 قرش، ووصل سعر كيلو الجبنة الشيدر لـ 241 جنيه بتراجع 44 جنيه، وسعر كيلو الجبنة الثلاجة وصل لـ 123 جنيه بتراجع 4 جنيه في الكيلو.
أما عن أسعار السمك فسجل سعر كيلو سمك قشر البيا 117 جنيها، بتراجع 12 جنيها، وسعر كيلو الجمبري الممتاز وصل لـ 320 جنيه بتراجع 5 جنيه، وسعر كيلو سمك المرجان وصل لـ 135 جنيه بتراجع 8 جنيه للكيلو، وتراجع سعر كيلو الماكريل المجمد 4 جنيه.
ومن الالبان والأسماك والسلع بنروح لاسعار الفاكهة، واكد الوكيل ان أسعار الفاكهة تراجعت برضوا في مبادرة خفض الأسعار، ووصل سعر كيلو التفاح المحلي لـ28 جنيه 6 جنيه للكيلو، وسعر الأناناس وصل لـ 68 جنيه للكرتونة الواحدة بتراجع 5 جنيه، وسعر كرتونة الكيوي وصل لـ 304 جنيه بتراجع 83 جنيه .