قطاع الطيران واحد من المحاور الرئيسية اللي ركز عليها الرئيس عبدالفتاح السيسي من وقت بداية حكمة للجمهورية الجديدة.. ياتري ايه اللي عمله الرئيس السيسي في قطاع الطيران واية اللي بتستهدفه الحكومة من القطاع ده.. تعالوا نشوف الحكاية بدأت منين
القيادة السياسية شايفة أن قطاع الطيران واحد من المحاور الرئيسية في نجاح خطط التنمية الاقتصادية خصوصا أنه بيساهم في تنشيط الحركة السياحية وتنمية التجارة ودعم الاقتصاد القومي، وعلشان كده الرئيس السيسي وجه الحكومة بوضع اسس ثابتة ووضع أسس لتطوير وتحقيق التنمية الشاملة للنهوض بقطاع الطيران المدني.
في عهد الرئيس السيسي، الدولة اخدت خطوات مهمة لتطوير قطاع الطيران المدني، ومواجهة كل العقبات اللي كانت واقفة قدام الحكومات اللي مرت علي مصر قبل كده، وكمان تقديم التسهيلات اللازمة لعودة المصريين العاملين والمقيمين في الخارج في وقت الأزمات وده اللي حصل وقت انتشار جائحة كورونا لما الرئيس وجه الحكومة بالتنسيق لعودة المصريين من كل الدول، ومصر كانت واحدة من أوائل الدول اللي طبقت الإجراءات الاحترازية في كل المطارات المصرية وعلى متن الطائرات، وتم توجيه سلطة الطيران المدني لإصدار تشريعات وتعليمات ساهمت في زيادة ﻗدرة شرﻛات الطيران المصرية، وكان لمصر السبق في نقل المستلزمات والمعدات الطبية لكل دول العالم.
طيب اية اللي عملته مصر علشان تطور منظومة الطيران المدني؟.
توجيهات القيادة السياسية للحكومة بدأت تتنفذ من اللحظة الأولي وكانت البداية بتطوير منظومة الملاحة الجوية، ومصر استحدثت أنظمة رادارية بأحدث التقنيات العالمية، وده خلي المجال الجوي المصري في المراكز الاولي عالميا في مجالات مراقبة الملاحة الجوية،، وبعدها الحكومة طورت شبكة الأقمار الصناعية لتأمين نقل البيانات الرادارية والاتصالات الصوتية واتصالات المدي البعيد في المواقع الرئيسية جوا القطر المصري .
التطوير اللي وصل لكل نواحي الطيران المدني شمل كمان تطوير المنظومة الأمنية في المطارات من خلال تحديث وتطوير الإجراءات والأجهزة والمتابعة المستمرة لمعايير الجودة والسلامة الأمنية، وده ظهر من خلال إشادات المنظمات الدولية بالإجراءات الأمنية المتبعة في المطارات المصرية وعلى متن الطائرات، وفعلا مصر طبقت اجراءات امنية مشددة في كل مراحل السفر والوصول وإجراءات تأمين الركاب والشنط في كل المطارات المصرية، وكمان تضمنت رفع كفاءة العنصر البشري لأعلى مستويات التدريب الدولية وتزويد المطارات بكل الأجهزة للكشف والمراقبة وده مكن المطارات المصرية من اجتياز كل التفتيشات الدولية اللي مرت علي مصر .
في عهد الرئيس السيسي الدولة بنت كم كبير من المطارات الجديدة زي مطار العاصمة الإدارية الجديدة واللي مخطط له يكون مطار محوري علشان يخفف الضغط علي مطار القاهرة الدولي، وكمان مطار سفنكس الدولي واللي مصمم لخدمة أهالي محافظات الجيزة وبني سويف والفيوم والمنيا، وكمان خدمة الوفود السياحية اللي جاية علشان تزور منطقة الاهرامات والمتحف المصري الكبير والمنطقة الاثرية في الجيزة، ده غير مطارات برانيس ومطار سانت كاترين وغيرها من المطارات الكتيرة اللي مصر بتشيدها علشان تساهم في زيادة الحركة الجوية والسياحية الوافدة إلى مصر .
الجديد في قطاع الطيران المدني كانت توجيهات الرئيس السيسي من أيام للحكومة باتخاذ التدابير اللازمة لتحفيز مشاركة القطاع الخاص في جهود تطوير قطاع الطيران، ومواصلة العمل المكثف على مستوى جميع عناصر المنظومة، بما فيها مطار القاهرة الدولي ودا لمضاعفة طاقته الاستيعابية لتصل إلى إجمالي 60 مليون راكب سنويا بدلا من 30 مليون، والمساهمة في تحقيق التنمية الاقتصادية الشاملة، وفقاً لرؤية مصر 2030.