عشان تشتري عربية زيرو تنفعك في الحر ده وتقضي بيها مشاويرك وترحم ولادك من زحمة الموااصلات الموضوع بقي صعب مع ارتفاع اسعار العربيات وعشان كده فيه ناس كتير مش عارفة تكيش تمن العربية مرة واحدة والتجار مش بيبيعوا دلوقتي قسط غير قليل جدا وبفايدة عالية اووي.. بانكير هيقولك تشتري عربيتك منين وبالتقسيط المريح وبأقل أوراق ومستندات .
بنوك كتيرة بتقدم خدمة تمويل شراء السيارات ولكل بنك ميزة مختلفة والنهاردة هشنوف ازاي تجيب عربية من بنك مصر ودا لأنه بيقدم باقة متنوعة من برامج التمويل والخدمات البنكية، بإجراءات سهلة وبسيطة وبتتناسب مع جميع الموظفين بالحكومة أو القطاع العام والخاص وكمان مع أصحاب المهن الحرة والأنشطة التجارية والصناعية، وأصحاب الأوعية الادخارية.
شوف ياسيدي بنك مصر،بيقدملك فرصة قرض السيارة الجديدة لتتناسب مع رغبات العملاء، وبأسعار فايدة تنافسية وبإجراءات سهلة وسريعة وأطول فترة سداد تصل إلى 10 سنين يعني يدينا ويديك طول العمر .
وبخصوص تفاصيل وشروط قرض السيارة من بنك مصر فلازم تعرف قبل ماتروح البنك إن سعر الفايدة تنافسي والحد الأدنى لعمر المقترض 21 سنة. والحد الأقصى للقرض 6 مليون جنيه.. وكمان نسبة التمويل تصل إلى 100%. ودي الأهم يعني هتاخد العربية من غير ماتشيل هم دفع اي مبالغ تانية للتاجر. ومدة تمويل تصل إلى 120 شهر.
والقرش بيكون للموظفين بشرطة تعهد جهة العمل بتحويل الراتب / القسط الشهري وبموجب إثبات الدخل طبعا.
وبالنسبة لأصحاب المهن الحرة وأصحاب الأنشطة التجارية والصناعية هيكون مطلوب منهم إثبات الدخل.. ولأصحاب الأوعية الادخارية للمصريين والأجانب. فالمستندات الأساسية المطلوبة للحصول على قرض السيارة من بنك مصر هي:
صورة بطاقة الرقم القومي سارية.
أصل إيصال مرافق على مقر إقامة العميل (غاز-كهرباء – مياه – تليفون ).
عرض أسعار معتمد من المعرض.
طيب ايه هي المستندات المطلوبة من الموظفين للحصول على قرض السيارة؟.. كلها مستندات سهلة وهي:
شهادة مفردات الراتب الشهري.
تعهد جهة العمل بتحويل الراتب / القسط الشهري (في حالة تعهد جهة العمل).
أما المستندات المطلوبة من أصحاب المهن الحرة والأنشطة التجارية والصناعية للموافقة على قرض السيارة من بنك مصر فهي:
صورة البطاقة الضريبية.
صورة ترخيص / تصريح مزاولة المهنة (للمهن الحرة).
صورة مستخرج رسمي حديث من السجل التجاري.
كشف حساب بنكي لمدة 6 أشهر.
ولسه الكلام مخلصش عشان فيه مميزات إضافية للحصول على قرض السيارة من بنك مصر ومنها
العميل أو صاحب القرض هياخد وثيقة تأمين مجانية على الحياة طوال فترة عمر القرض ويقدر كمان يرخص السيارة باسم طرف تالت من أفراد العائلة وكمان بدون تامين وحظر بيع على السيارة .
وفيه حاجة أخيرة وهي إن بنك مصر بيمول شراء سيارات مستعملة لكن بشروط محددة ولازم تعرفها من موقع البنك الالكتروني.