الدولار ياترى رايح على فين وإيه الجديد في البنوك النهاردة وإيه الرسايل اللي البنك المركزي قالها في الساعات الأخيرة وياترى الجنيه هيعمل ايه في الايام الجاية.. تابعونا في الفيديو ده وهتعرفوا التفاصيل كلها
طبعا كلنا شفنا هوجة الدولار اللي حصلت امبارح والقفزة الكبيرة في السعر واللي قربت من 50 جنيه للدولار والحقيقة الدولار بيزيد بشكل منتظم أمام الجنيه من يوم الاربعاء اللي فات ولو خدنا بالنا من التاريخ ده هنلاقي إن مرتبط بتطور الاحداث الخطيرة في المنطقة حولينا واللي بعدها بدأت أسواق المال في العالم كله تنهار والبورصات العالمية وخاصة الامريكية خسرت تريليونات الدولارات والعالم بقي في حالة فوضى واكيد ده ليه تأثير مباشر على اللي بيحصل في مصر لأن مصر على خط الخطر مباشرة بسبب وجود الصراعات على حدودها مباشرة ودا كان سبب الفوضي اللي حصلت
امبارك أو حالة الارتباك في سوق الصرف.
طيب اي اللي حصل النهاردة التلات في البنوك؟
شوف ياسيدي إللي حصل إن المركزي بيشرف على سوق الصرف بهدوء أعصاب شديد ومن غير أي تهور وسايب الدولار يعلب ويتحرك فوق وتحت طالما في حدود العرض والطلب وسعر الصرف المرن ومفيش أي تدخلات أو تلاعب في الاسواق ولان المركزي عارف إنه في النهاية الحكاية عرض وطلب يبقي الدولار راجع وفعلا رجع النهاردة ينزل بشكل كبير من تاني قدام الجنيه في التعاملات الصباحية وإن حالة الطلب على الدولار امبارح كانت طبيعية بجانب شوية عوامل تانية خلت السوق في حالة اضطراب منها التقارير اللي اتكلمت عن خروج أكتر من 4 مليار دولار من السوق المصري عبارة عن أموال ساخنة في سوق السندات وأذون الخزانة المصرية وانباء عن تطور خطير في الايام الجاية بخصوص الصراع اللي في المنطقة.
البنك المركزي ليه مطلعش وعلق على ارتفاع سعر الدولار امبارح؟
لسبب بسيط حضرتك وهو إن بقي عندم سوق مرنة وحرة في سعر الصرف ومفيش أي تدخلات أو خطر عليها ولأن المركزي عارف السوق ماشي ازاي وعارف حجم المعروض والاحتياطي الدولاري اللي عنده وكمان خريطة التدفقات الدولارية الكبيرة وإن مفيش أزمة اطلاقا في الدولار وإن السوق تحت السيطرة وكمان مفيش أي فرصة لعودة السوق الموازية أو السودا من تاني لان مفيش أزمة شح دولار لكن فيه طلب زيادة عليه وهنا الفرق كبير بين المشهد في 2023 والوضع الحالي وعشان كده لما الدولار قفز لأكتر من جنيه امبارح المركزي مقلقش ولو وصل لأكتر من كده بردو مفيش مشاكل لأن الموضوع عرض وطلب وسعر فوق وسعر تحت.
طيب ليه المركزي مش هيقدر يتدخل في سعر العملة تاني؟
لأن خلاص انت بقي عندك سياسة مالية جديدة والمستثمرين ضخوا مليارات بناء على السعر الحر للدولار وأي تدخل تاني مصر هتفقد مليارات الدولارات في ساعات قليلة وده غير الخسارة الكبيرة وهي خسارة سمعتها الدولية في اسواق المال والاستثمار.