ناس كتير بتسأل هي مليارات صفقة راس الحكمة والقروض راحت فين وليه الدولار بيرفع رغم التدفقات الدولارية الكتير اللي دخلت البلد.. شوف التقرير دا وانت تعرف المفاجأة خليكم معانا للأخر
الحكومة وقعت صفقة رأس الحكمة ب35 مليار دولار وباستثمارات اجمالية 150 مليار دولار مع نهاية المشروع ودا غير قروض أخدتها الحكومة لمواجهة ازمات الدولار اللي ضربت السوق المصرفي بعد خروج الأموال الساخنة بعد الأزمة الروسية وارتفاع أسعار المواد الغذائية بشكل غير مسبوق.
الحكومة ردت على أسئلة الناس بخصوص مصير أموال راس الحكمة والقروض وكان ردها في صورة أرقام وقالت إن مصر استوردت أكل وشرب بـ 11.5 مليار دولار في أول 9 شهور من 2024، بزيادة 2% عن الفترة نفسها من السنة اللي فاتت.
قائمة السلع التموينية الاستراتيجية اللي استوردتها الحكومة ولما بنقول استراتيجية يعني مفيش غنى عنها ولا ينفع تنقص في البلد لأنها سلع أمن قومي زي القمح، والأرز، والفول، والسكر، والشاي، والذرة والفول الصويا، والزيوت النباتية، والعدس، والألبان ومنتجاتها، واللحوم، والدواجن، والأسماك، والحيوانات الحية.
مصر كمان وحسب نشرة الحكومة استوردت لحوم ودواجن وأسماك وقشريات بقيمة 1.2 مليار دولار، وأسماك وقشريات بقيمة 355 مليون دولار، وبلغت فاتورة واردات الدواجن 39 مليون دولار، و بـ 808 مليون دولار لحوم.
ولسه مع الأرقام حضرتك مصر استوردت سيارات وقطع غيار سيارات ب3.9 مليار دولار في نفس الفترة وبلغ إجمالي قيمة واردات مصر، وفق النشرة الشهرية لبيانات التجارة الخارجية اللي بيصدرها الجهاز المركزي للتعبئة العامة والإحصاء، نحو 7.86 مليار دولار خلال سبتمبر بس 2024.
ونروح لقطاع الغاز هنلاقي أرقام تخض لأن مصر استوردت شحنات وقود من الخارج بقيمة تجاوزت 12.5 مليار دولار خلال أول 10 أشهر من 2024، مقابل 10.5 مليار دولار في ذات الفترة من العام الماضي يعني بزيادة بلغت 19%..
كل الأرقام اللي قلناها ودي مجرد أمثلة لأن فيه صادرات تانية كتير وكفاية تعرف إن مصر استوردت حاجات ب42 مليار دولار في أول 6 شهور من 2024 وطبعا فاتورة الاستيراد دي بتيجي من الموارد الدولارية للدولة زي الصفقات الاستثمارية والقروض وايرادات قناة السويس والسياحة وتحويلات المصريين بالخارج.
الخلاصة إن تقليل فاتورة الاستيراد هو التحدي الاكبر للحكومة دلوقتي لأانها وحش بتاكل وتستنزف موارد الدولة من العملة الصعبة وزيادة الطلب على الدولار ودا بيرفع سعر الدولار لان فيه مستوردين قطاع خاص بيحتاجوا الدولار عشان يدفعو تمن البضاعة بتاعتهم وعشان كده الحكومة شغالة على خطط توطين الصناعة المحلية لتقليل الاستيراد لأقصى درجة ممكنة بجانب تحسين جودة المنتج المصري عشان ينافس في السوق المحلي والخارجي وغير كده مصر هتفضل تدفع عشرات المليارت كل سنة على الاستيراد.