موسم الاعياد واحد من المواسم اللي اغلبنا بيكون محتاج فيه لمصاريف زيادة، وعلشان كده اغلب الجهات الحكومية بتعمل منح للعمال بمناسبة الاعياد والمناسبات.. يا تري هل هيكون في منحة لعيد الاضحي اللي جاي ولو فيه منحة هتوصل لكام
الظروف الاقتصادية اللي اغلبنا بيمر بيها وخصوصا الموظفين في القطاع العام فرضت علينا مصاريف اضافية خصوصا مع الارتفاعات اللي حصلت علي مدار الشهور الطويلة اللي فاتت في اسعار السلع والخدمات واللي طبعا في الوقت الحالي عايزة ميزانية لوحدها.
مع دخول الاعياد والمناسبات بيكون عندنا عادات سنوية في اغلب بيوتنا وهي اننا بنزل نشتري ملابس للأسرة والاطفال ده غير مستلزمات العيد واللي بتكون واحدة من اهم الادوات اللي بتفرح الاسر في الاعياد وخصوصا بقي لما يكون عيد الاضحي واللي طبعا كلنا فيه لازم نذبح الاضاحي ونوزع لحوم علي الفقراء والمساكين في السنة اللي اجنا اتربينا عليه من ايام سيد ابراهيم واسماعيل عليهم السلام.
وطبعا زي ما انتو عارفين اننا دلوقتي علي اعتاب عيد الاضحي المبارك وحاليا كل الموظفين بيسالوا عن منحة عيد الاضحي المبارك واية هيا شروطها وازاي يقدروا يحصلوا عليها، وهل كل الوزارات والهيئات هتعمل منحة لعيد الاضحي ولا وزارات وهيئات معينة.
مصادر حكومية قالت إن الجهات الحكومية بتستعد حاليا لوضع آليات صرف منحة عيد الأضحي وبدأت تعدد التقارير اللازمة وحصر أعداد العاملين بكل جهة علشان تحديد قيمة المنحة وموعد صرفها، وأن صرفها هيكون قبل العيد بوقت كافي علشام يكون قدام الموظفين الفرصة لشراء احتياجاتهم للعيد.
طيب المنحة دي هتوصل لكام وهل هتختلف من وزارة للتانية ومن درجة وظيفية لدرجة وظيفية تانية.
المصادر الحكومية كملت كلامها وقالت أن قيمة المنحة هتختلف من جهة للتانية حسب الميزانية وبنود الصرف المستقلة سواء كانت من صناديق الخدمات أو صناديق الطوارئ والأزمات والدعم المجتمعي، وأن قيمة منحة عيد الأضحي 2هتتراوح من 750 جنيهًا إلى راتب شهر كامل من الأجر الأساسي في الجهات الحكومية ذات الطابع الإنتاجي والاستثماري والتسويقي، لكن في جهات تانية هتمنح شهرين كمنحة لعيد الاضحي من الراتب الأساسي.
المصادر نفسها كملت كلامها وقالت إن ميزانية منحة عيد الأضحي هتكون من بنود صرف مستقلة خاصة بكل جهة حكومية وتطبيقها هيكون بالتنسيق مع الإدارات المالية في كل جهة لوحدها وهتكون وفقا للوائح الداخلية المنظمة لشئون العمل.
طيب هل في جهات اعلنت أو حددت منجة عيد الاضحي هتوصل لكام؟.
طبعا، في بعض الجهات أعلنت وحددت قيمة منحة عيد الاضحي، والبداية كانت من هيئة السكك الحديدية ومترو الانفاق واللي أعلنت عن موافقة وزارة النقل علي منح العاملين بالهيئة ومترو الأنفاق والشركات التابعة 750 جنيهًا منحة بمناسبة عيد الأضحى المبارك، وان اعتبارا من الاسبوع الجاري هيتم صرف المنحة لـ 65 ألف عامل بالسكة الحديد والمترو .